# शालेय वाचनालय : काही उपक्रम.

..

.. 

     ‘वाचन प्रेरणा दिवस’ साजरा करून झाला.या दिवशी अनेक शाळांतून ‘वाचनालये’सुरु झाली. ही खूप आनंदाची गोष्ट आहे. खरं तर पुस्तकांचं हे विश्व मुलांसाठी खुलं करायला हवं. वाचनातून ‘समज’ तर वाढतेच त्याचबरोबर ‘आपली स्वत:शी ओळख’ व्हायला मदत मिळते. खूप सुंदर अनुभव असतो हा.

      याचसाठी एक छोटा प्रयत्न करून पाहतोय. आपल्या वाचनालयासाठी काही छोट्या कृती घेऊन आलोय. मज्जा आणि वाचनाचा आनंद एकत्र घेता येईल.आपणास आवडतील.यातील काही कृती मी स्वत: करून पहिल्या आहेत. काही कृती नव्याने करून पाहतो आहे.

..

..

# शिक्षकांसाठी थोडे.

     वाचनालयातील विविध कृती घेत असताना शिक्षक हा महत्त्वाचा दुवा ठरतो. त्यांनी हे नियोजन करताना काही गोष्टी लक्षात ठेवणे आवश्यक आहेत. त्या खालीलप्रमाणे ...

     [१] उपक्रमाचे उद्दिष्ट डोळ्यासमोर असायला हवं. अन्यथा बऱ्याच वेळा आपण काही कृती घेत राहतो मात्र उद्दिष्टे ठरवायला व ती आमलात आणायला विसरतो.

     [२] आपण पुस्तकाची निवड काळजीपूर्वक करायला हवी. आपल्या कृतीना अनुसरून त्यांची निवड करायला हवी.

उदा. कविता पूर्ण करा. या उपक्रमासाठी कवितासंग्रह निवडावा लागेल.

     [३] कृतींना अनुसरून मुलांचे लहान किंवा मोठे गट करावेत.

     [४] वाचन कृतींसाठी वर्गाची रचना अर्धगोलाकार हवी.

     [५] विद्यार्थ्यांध्ये स्पर्धा निर्माण होईल अशा कृती टाळाव्यात. उलट सर्वच मुलांना वाचनासाठी प्रोत्साहित करणाऱ्या, सहकार्य आणि शिकण्याच्या प्रक्रियेला चालना देणाऱ्या कृती असायला हव्यात.

     [६] बसण्यासाठी चटई, बस्कर किंवा बेंच असतील तर त्यांची रचना अर्धगोलाकार करावी.त्यामुळे होणारी आंतरक्रिया अधिक परिणामकारक होते.

     [७] मुलांना प्रोत्साहनासाठी टाळ्या,शाबासकी,कौतुक इ.चा वापर करावा.आपण हे लक्षात घ्यायला हवे की वाचानालाची कृती ही मुलांची वाचनाची आवड जागृत करणारी असायला हवी. त्यामुळे मुलाविषयी नकारात्मक भूमिका घेऊ नका व तशी भाषाही वापरू नका.

    [८] मुलांचा वयोगट व आवड इत्यादीचा विचार करूनच पुस्तकांची निवड करावी. लहान आकाराची भरपूर चित्रांची पुस्तके असावीत. जी मुलांना खूप आवडतात.तिसरी चौथीसाठी ठळक अक्षराची पण लहानच पुस्तक निवडावीत. आवडीनुसार पुस्तकं देता येतील.सक्ती करू नये.

..

आठवड्याला एक अशी कृती शेअर करत जाईन.

..

आणखी वाचत रहा  My World/farukskazi.blogspot.com  या माझ्या ब्लॉगवर...

फारूक एस.काझी.

नाझरा, ता.सांगोला,जि.सोलापूर.

८२७५४५९२७६

farukskazi82@gmail.com